Kubonakala ngathi i-Orlando Pirates ayidinwa kukubetha AmaZulu njengokuba iwabethe ngenqaku elinye eqandeni kumdlalo weDStv Premiership e-Orlando Stadium, eSoweto, ngokuhlwa kwangoMgqibelo.
UTshegofatso Mabasa ufake elinqaku libalulekileyo leeBuccaneers ngomzuzu wamashumi asixhenxe anesihlanu emva kokufumana ibhola ebisuka kuMonnapule Saleng.
Ezinkunzi zaseSoweto zikhuphele Usuthu ngaphandle kwiNedbank Cup zilubetha ngamanqaku amane kwamabini eMoses Mabhida Stadium, eThekwini, kuloMgqibelo ogqithileyo.
Kusenjalo, umfana oselula u-Asekho Tiwani ufake inqaku elincede iSekhukhune United ibethe iCape Town Spurs esezinzingweni ngenqaku elinye eqandeni ePeter Mokaba Stadium, ePolokwane.
