Intshatsheli yoMzantsi Afrika u-Asemahle ‘Predator’ Wellem uvana amandla nommi waseRussia uDenis Savitsky kumlo wemijikelo elishumi njengokuba zombini ezimbethi-manqindi ezingekabethwa zidibana eChelyabinsk kwelaseRussia ngoMgqibelo.
UWellem, oyinjinga yoMzantsi Afrika kudidi lwesuper-middleweight, ushiye ilizwe lakhe lokuzalwa kuleveki esiya kwiRussia ebandayo enyeke ukuqhubela phambili nokungabethwa.
Ephumelele imilo esixhenxe, enqumamise amadoda amathathu, wabambana kanye, uWellem ujonge impumelelo kutyelelo lwakhe lokuqala kwelaseRussia.
Kwelinye icala, uSavitsky, ongumhlali wase-Irkutsk, uphumelele imilo elithoba, enqumamisa amadoda amathandathu, wabambana komnye.
“Izinto zisahamba kakuhle okwangoku. Ndizakumbona okokuqala ngoLwesihlanu lomntu endizakulwa naye,” utshilo uWellem, oyinzalelwane yaseChintsa.
Lo ngumlo wokuqala kaWellem ukususela ukuba wabambana nommi waseTanzania uSelemani ‘Mamba’ Kadunda kwelaseTanzania kwiinyanga ezimbini ezigqithileyo, logama uSavitsky egqibele ukulwa ngethuba ebetha umkhaya wakhe waseRussia uSergei Ekimov ngoFebruwari kulonyaka. – Monwabisi Jimlongo
