Nangona nje inkampu kaSivenathi ‘Special One’ Nontshinga isatye tyum ngomlo wakhe nommi wasePhilippines uRegie ‘The Filipino Phenomenon’ Suganob kwisithuba seenyanga ezintathu ezizayo, uFloriezyl Podot uwudizile umhla womlo.
UNontshinga noSuganob bazakulwa kwilinge lokuzibekela indawo kumlo wentshinga ye-International Boxing Federation (IBF) kudidi lwejunior-flyweight.
“Umlo uzakubalapha kwelasePhilippines ngomhla weshumi elinambini kuSeptemba,” utshilo uPodot ongumthelekisi kaSuganob noshishina ngaphantsi kwebhanile yePMI Bohol Boxing Promotions.
UNontshinga wabetha uSuganob ngamanqaku kumlo wabo wokuqala ngethuba wayekhusela intshinga ye-IBF kudidi lwejunior-flyweight e-International Convention Centre (ICC), KuGompo City, ebutsheni bukaJulayi ngo-2023. Abagwebi yayinguGil Robiego Co (116-111) wasePhilippines, umFrentshi uJerome Lades (116-111) nomkhaya wakhe u-Ammar Sakraoui (117-110).
UNontshinga, oneminyaka engamashumi amabini anesixhenxe, ubekwa kwindawo yesihlanu kuluhlu lwe-IBF ratings, logama ekwindawo yeshumi elinesihlanu kwiWorld Boxing Organisation (WBO).
Ukanti, uSuganob, oneminyaka engamashumi amabini anesibhozo, ukwindawo yesithathu kwi-IBF, kweyesihlanu kwiWorld Boxing Council (WBC) nakweyesibini kwiWBO. – Monwabisi Jimlongo
