Ibiyimvula yamanqaku eLoftus Versfeld, ePitoli, ngokuhlwa kwangoLwesithathu ngethuba iMamelodi Sundowns iquthisa AmaZulu ngamanqaku amahlanu kwamabini kumdlalo weBetway Premiership.
IiBrazilians ziphale phambili ngenqaku elihle nelifakwe nguBrayan León emva kokudlala kakuhle kunye noCassius Mailula ngomzuzu wamashumi amabini anesihlanu. Kwimizuzu emihlanu emva koko, uTeboho Mokoena ufake inqaku lesibini leentshatsheni zase-Afrika ebetha unozinti wAmaZulu uWilfried Kouassi ngebhola etshawuzayo.
Ifolosi, eyinzalelwane yaseZimbabwe, uThandolwenkosi Ngwenya, ufake inqaku lokuqala lAmaZulu kwimizuzu esixhenxe ngaphambi kokuhlaba ikhefu.
Kwimizuzu emibini nje kwisiqingatha sesibini, uTashreeq Matthews wongezeze iSundowns inqaku, waze uLeón wafaka inqaku lesibini kulomdlalo.
UNgwenya, ongumfaki manqaku ophambili kuMaZulu, ufake inqaku lakhe lesibini kulomdlalo ngomzuzu wamashumi amathandathu anesixhenxe.
Kuthe kanti iSundowns ayikagqibi njengokuba uBennet Mokoena, oneminyaka elishumi elinethoba, efake inqaku lesihlanu leeBrazilians kwixesha elongezwe ngusompempe.
Ukanti, iRichards Bay FC neKaizer Chiefs zibambene ngamanqaku amabini macala omabini, logama iLamontville Golden Arrows ibethe iStellenbosch FC ngenqaku elinye eqandeni, logama iPolokwane City ibambene ngeqanda macala omabini kumdlalo neMilford FC.
