UXolisani ‘Nomeva’ Ndongeni uziva enethamsanqa, efumana elinye ithuba lokulwa njengokuba ezakulwa okwesithathu kulonyaka xa equbisana noCrispin Moliati ekuthwaseni kwenyanga ezayo.
UNdongeni, owayesakuba yinjinga ye-International Boxing Organisation (IBO) kudidi lwelightweight, uzakulwa noMoliati kwimijikelo esibhozo eBox Camp Booysens, eRhawutini, ngeCawa umhla wesihlanu kuMeyi.
Njengangoku, lentshatsheli yamhlamnene kudidi lwejunior-lightweight nolwelightweight eMzantsi Afrika sele ilwe kabini kulonyaka – ikhala ngaphantsi kwiimbethi-manqindi zaseMelika u-Arnold Barboza Junior ngoJanyuwari noRaymond Muratalla kulenyanga ephelileyo.
“Ndibenethamsanqa ukufumana lomlo. Ndingumntu onethamsanqa kakhulu, uThixo ungecala lam,” uNdongeni, ozayokubeka uyisemkhulu kwikhaya lokulinda KwaBhaca ngoMgqibelo, utshilo.
UNdongeni yimbethi-manqindi yaseMzantsi Afrika yesine ukulwa noMoliati. Lommi waseMalawi wabethwa kabini nguTshifhiwa Munyai, waze waquthiswa kanye ngu-Ayanda Nkosi noKoos Sibiya.
Kusenjalo, uNdongeni udize ukuba unqeqeshi wakhe uMzamo ‘Chief’ Njekanye waseDuncan Village, eMonti, nguye ozakubasekoneni xa esilwa noMoliati.
IbinguReniel Aponte noMichael Robles baseKO Fitness Gym eMiami, eMelika, ebebesekoneni kaNdongeni ngethuba esilwa noMuratalla.
