Igaleleke eMonti ngoLwesibini imbethi-manqindi yaseNamibia uSebastianus ‘Iron Fists’ Natanael kanye iintsukwana ezimbalwa ngaphambi komlo wakhe no-Azinga ‘Golden Boy’ Fuzile.
Lo mlo phakathi kukaFuzile noNatanael izakuba nguwo ophambili kwitumente elilima leLast Born Boxing Promotions neKay B Promotions e-Orient Theatre, eMonti, emva kwemini ngeCawa.
UFuzile, owayeyinjinga yoMzantsi Afrika kudidi losiba, uzakulwa okokuqala phambi kwabalandeli bakhe baseMonti ukususela mhla wanqumamisa uRomeo Makwakwa waseMalawi kumjikelo wesithathu ngoJulayi 2022.
Kwaye ngumlo wesibini lo walomfana oneminyaka engamashumi amabini anesibhozo njengokuba ebuyele kudidi lwejunior-lightweight emva kokuthabatha isigqibo sokulwa kwalightweight. UFuzile wanqumamisa u-Emmanuel Amos Stefano waseTanzania eSada ngoDisemba wonyaka ophelileyo.
