Athelekisiwe amaqela amane agqithele kwimidlalo eyandulela amagqibelakankqoyi yeCarling Knockout ngethuba etsalwa ngeCawa emva kwemini.
IMarumo Gallants, ekhuphele ngaphandle iintshatsheli zesizini egqithileyo iStellenbosch FC, izakudlala neMamelodi Sundowns ekhaya kulempelaveki ezayo. IiBrazilians zifikelele kumaqela amane okugqibela emva kokutywatyusha iKaizer Chiefs ngamanqaku amane eqandeni eRhawutini ngoMgqibelo ngokuhlwa.
Ukanti, iRichards Bay FC izakudlala neMagesi FC komnye umdlalo. IiNatal Rich Boyz zingene kumaqela amane okugqibela emva kokubetha iCape Town City ngoMgqibelo, logama iMagesi ibethe i-TS Galaxy ngeCawa.
Kusenjalo, iFree State Stadium, eMangaung, izakusingatha umdlalo wamagqibelankqoyi ngoMgqibelo umhla wamashumi amabini anesithathu kuNovemba.
