IMamelodi Sundowns ithe ngcu phezulu kumanqwanqwa eBetway Premiership emva kokutywatyusha iSekhukhune United ngamanqaku amathathu eqandeni kumdlalo obubanjelwe eLoftus Versfeld, ePitoli, ngokuhlwa kwangoMgqibelo.
Izangxa zaseTshwane ziphale phambili emva kokuba uTrésor Tshibwabwa Yamba Yamba ehlabe ekhaya ngomzuzu wamashumi amabini anesibini.
Ngelingeni u-Arthur de Oliveira Sales ude walifumana inqaku lakhe lokuqala kwiSundowns elifaka ngemizuzu emine siqalile isiqingatha sesibini. U-Iqraam Rayners uqinisekise ukuba bayayingcwaba iBabina Noko xa kanye bekuzakuphela umdlalo.
Kusenjalo, iChippa United yonyuke yaya kwindawo yesithathu kumanqwanqwa eBetway Premiership emva kokuquthisa iMagesi FC ngamanqaku amabini eqandeni eBuffalo City Stadium, eMonti.
Omabini lamanqaku afakwe nguSinoxolo Kwayiba ngomzuzu wesixhenxe nangowamashumi amane anesine enceda iiChilli Boys ukuba zibethe intshatsheli zeCarling Knockout.
