Kwiiveki nje ezimbalwa emva kokubethwa nguBo Mi Re Shin waseKorea Republic, intshatsheli yelizwe uNtombokuqala Tolashe ulungiselela ukulwa noMatshidiso Mokatsane kumlo oyimpinda.
Lenjinga yoMzantsi Afrika kudidi losiba kwicandelo labasetyhini, eyahlutha intshinga kuMokatsane eKapa ngo-Agasti nyakenye, izakulwa nalenzalelwane yaseKroonstad ngomhla wamashumi amabini anesibini kuMatshi.
“Ndixakekile ndilungiselela umlo wam noMatshidiso. Ndizakube ndikhusela intshinga yam ngomhla wamashumi amabini anesibini kuMatshi,” uTolashe uxelele i-Ink Sport.
Kusenjalo, uTolashe wabethwa ngamanqaku kumlo owawuSeoul, eKorea Republic, ngethuba esilwa noShin, owayeyintshatsheli yeWorld Boxing Council (WBC) International neWorld Boxing Organisation (WBO) Asian Pacific kudidi lwejunior-lightweight, ngoDisemba.
UTolashe, oneminyaka engamashumi amabini anesibhozo, wazwilela kakhulu kulamlo emva kokufika kwelaselizwe lase-Asia kwiiyure ezingamashumi amane anesibhozo ngaphambi komlo. – Monwabisi Jimlongo
