Izinto azihamba ngalendlela imbethi-manqindi yoMzantsi Afrika uPhumelela ‘The Truth’ Cafu ebenqwenela ukuba zihambe ngayo njengokuba ebethwe nguJesse ‘Bam’ Rodriguez waseMelika eFord Centre, eStar Frisco, eDallas, eTexas, kwelaseMelika ngentseni yangeCawa, ngokwexesha loMzantsi Afrika.
URodriguez, ongekabethwa, ubemongamele uCafu ukusuka kumjikelo wokuqala de ikona yalenzalelwane yaseDuncan Village yaphosa itawuli kumjikelo weshumi. UCafu ebesele esemva ngamanqaku ngexesha lokuphela komlo.
Ngaphandle kokukhusela iintshinga zakhe zeWorld Boxing Council (WBC) neRing Magazine kudidi lwejunior-bantamweight, uRodriguez wongeze nentshinga kaCafu yeWorld Boxing Organisation (WBO).
Ngenxa kokuphumelela kwakhe, uRodriguez uliphucule irekhodi lakhe njengokuba eyiphumelele yonke imilo yakhe engamashumi amabini anesibini, enqumamise amadoda alishumi elinesihlanu.
Kwelinye icala, uCafu uphulukene nomlo okokuqala njengokuba ephumelele imilo elishumi elinanye, enqumamise amadoda asibhozo, wabethwa kumlo omnye, waze walwa ngokulingana kwimilo emithathu.
