ULubabalo Kweyi, olikroti, unyeke intshinga yoMzantsi Afrika kudidi lwejunior-lightweight njengokuba efuna intshatsheli u-Asanda Gingqi alwe naye.
Kungoku nje, uKweyi, oneminyaka engamashumi amabini anesithathu nongowaseMdantsane, uzibonakalisile iinjongo zakhe ngokufaka isicelo Boxing South Africa (BSA), ecela umngeni kulentshinga.
“Siluthumele kuBSA uxwebhu olucela umngeni kwintshinga yoMzantsi Afrika kudidi lwejunior-lightweight,” uThembelani ‘Shakes’ Hlombe, ongumlawuli kaKweyi, uxelele i-Ink Sport.
UKweyi, ophumelele imilo emithathu, wanqumamisa amadoda amathathu, walwa ngokulingana kwimilo emibini, akakalwi ukususela mhla wabetha uBulelani Ngondeka ngo-Okthobha nyakenye.
Kwelinye icala, uGingqi ubuya kumlo we-African Boxing Union (ABU) kudidi lwejunior-lightweight, apho wayesilwa khona noTony Rashid Ngongo waseTanzania. UGingqi wawuphumelela ngamanqaku lo mlo owawubanjelwe e-Orient Theatre, eMonti, kulenyanga ephelileyo.
Lenzalelwane yaseMdantsane igqibele ukukhusela intshinga yayo ngethuba ibetha uKhanyisani Mbokazi xa yayikhusela esisithsaba eMonti ngoDisemba kulonyaka ophelileyo.
UGingqi, oneminyaka engamashumi amathathu anesibini nowayeyinjinga yoMzantsi Afrika kudidi losiba, uphumelele imilo elishumi elinesithandathu, wanqumamisa amadoda alithoba, wabethwa kwimilo emithathu. – Monwabisi Jimlongo
