U-Akani Phuzi uzakulwa okwesibini kulonyaka njengokuba ezakungquzulana nommi waseCanada nobekwa phezulu kuluhlu lwehlabathi uRyan ‘The Bruiser’ Rozicki eCanada ngo-Okthobha.
UPhuzi, oneminyaka engamashumi amathathu ananye, uzakulwa noRozicki kumlo weWorld Boxing Council (WBC) Continental Americas kudidi lwecruiserweight ngoMgqibelo umhla wamashumi amabini anesithandathu ku-Okthobha (NgeCawa umhla wamashumi amabini anesixhenxe, ngokwexesha loMzantsi Afrika).
UPhuzi ubethe uYoussouf Kasongo Mwanza waseDemocratic Republic of Congo (DRC) kumlo obusePitoli kwisithuba esingaphaya kweenyanga ezimbini, logama isixhiphothi wsaseCanada uRozicki walwa ngokulingana noYamil Alberto Peralta wase-Argentina kumlo weWBC kudidi lwecruiserweight ngoDisemba kulonyaka ophelileyo.
“Ndivuya kakhulu ngokufumana lo mlo. Ndive ngalomlo kwiiveki ezimbalwa ezigqithilwyo. Lithuba elihle lokokuba ndilwe nomntu obekwa phezulu, kwaye ndinento ethi ndizakuwuphumelela lomlo,” utshilo uPhuzi.
UPhuzi, oyinzalelwane yaseMalamulele eLimpopo noqeqeshwa nguDamien Durandt eRhawutini, uphumelele imilo elishumi elinesine, enqumamise amadoda amathandathu, wabethwa kwimilo emithathu.
URozicki, owayeyinjinga yeWBC International neNorth American Boxing Association kudidi lwecruiserweight, yimbethi-manqindi elushica nephumelele imilo engamashumi amabini, wanqumamisa amadoda alishumi elinethoba, wabethwa kumlo omnye, waze walwa ngokulingana komnye. URozicki ubekwa kwindawo yesibini kuluhlu lweWBC, aze abekwindawo yeshumi elinesithathu kwiWorld Boxing Organisation (WBO). – Monwabisi Jimlongo
