Ukukhumbula amanqindi abasetyhini ngo-Agasti kuphela izakuba yinto yezolo ukuba izinto zinokuhamba ngalendlela afuna ngayo uRina Subotzky, olilungu lebhodi kaBoxing South Africa (BSA).
USubotzky, onikwe uxanduva yiBSA ukuba akhokele iWomen in Boxing, ufuna ukuqinisekisa ukuba abasetyhini balwa rhoqo.
“Sifuna ukubona amanqindi eqhubela phambili isiphiwo sakhe nawuphi na umntwana oyintombazana. Sizakusebenza nzima ukuzisa amanqindi ezikolweni. Khawufane ucinge ukuba umbhoxo waseMzantsi Afrika ngewuphi ngoku ukuba ubungekho ezikolweni,” utshilo uSubotzky ngethuba ebethetha xa besukungulwa iWomen in Boxing ngokusesikweni eRhawutini ngoLwesihlanu.
UShereen Hunter noZanele Mdodana, abangamalungu ekomiti yeWomen in Boxing, bebeyinxalenye yokusungulwa kwelilinge. Elinye ilungu lalekomiti uKeletso Totlhanyo lingxengxezile njengokuba ebebambeke kwenye indawo.
Ingqonyela kaBSA uTsholofelo Lejaka kunye negosa lezemisebenzi uMandla Ntlanganiso nabo bebeyinxalenye yalentlanganiso. Ukanti, u-Asanda Simelane noSazisiwe Simon nabo bebekhona.
Amanqindi abasetyhini azakube eyinto ephambili ukususela kulenyanga kuyokuthi ga ngoFebruwari kulonyaka zayo.
Kungoku nje, zisibhozo iimbethi-manqindi zasetyhini ezizakulwa kwitumente enemilo esixhenxe nezakwenziwa yiGolden Gloves e-Emperors Palace, eKempton Park, Ekurhuleni, ngoMgqibelo kuleveki ezayo.
