Imbethi-manqindi ephambili yasetyhini nezinze eGqeberha u-Owethu Rula uzakufezekisa iphupha lakhe lokulwela intshinga yehlabathi xa evana amandla nentshatsheli yoMzantsi Afrika kudidi lwempukane uSimangele Hadebe eKapa.
URula, osebenza njengengcali yezobuchwephesha, ulwa noHadebe kumlo wentshinga engenamntu kwiWorld Boxing Federation (WBF) kwicandelo labasetyhini kudidi lwempukane eGrand West Casino.
“U-Owethu Rula uyabuya ngo-Agasti xa esilwela intshinga yehlabathi kwiWBF kudidi lwempukane. Lonto ithetha ukuba akasayilweli intshinga yoMzantsi Afrika. Uzakulwa noSimangele Hadebe, oyinjinga yoMzantsi Afrika,” utshilo uCaiphus Ntante, ongumlawuli kaRula.
Ekuqaleni, uRula ebecele umngeni kwintshinga kaHadebe, lomlo lowo oguqulwe ngabathelekisi beFighters Club Promotions waba ngowentshinga yehlabathi kwiWBF.
URula uzakuya kumlo noHadebe emva kokuphumelela imilo yakhe emibini yokugqibela ebetha uZizo Skoti noMihle Tuli. Kwelinye icala, uHadebe wabethwa ngamanqaku nguSibulele Soboois kumlo wentshinga engenamntu kwiWorld Boxing Organisation (WBO) Africa kudidi lwempukane ngoFebruwari kulonyaka. – Monwabisi Jimlongo
