Iqela eliphala phambili kumanqwanqwa eBetway Premiership, i-Orlando Pirates, ibonakalise ukungabinalusini ngethuba itywatyusha iKruger United ngamanqaku amane kwimbande yesikhova eMbombela Stadium, eNaspoti, ngokuhlwa kwangoLwesibini.
IPirates iqale ukophisa iKruger ngenqaku likaGhampani Lungu ngomzuzu wesine umdlalo uqalile. Usompempe womdlalo, uMoreki Lekwape, wohlwaye iKruger emva kokudlalwa kakubi kukaKamogelo Sebelebele ebhokisini.
Kwimizuzu esibhozo siqalile isiqingatha sesibini, uBoitumelo Radiopane uye wafaka inqaku lesibini leeBuccaneers emva komsebenzi omhle ka-Oswin Appollis.
Ilalela elingene ngomzuzu wamashumi amathandathu anesibini, uYanela Mbuthuma, ufake inqaku lesithathu lePirates kumzuzu wamashumi asixhenxe anethoba kwibhola ayinikwe ngu-Appollis. UMbuthuma uye wafaka inqaku lakhe lesibini kwixesha elongezwe ngusompempe emva kokufumana ibhola ebivela kuLebone Seema.
Kusenjalo, iDurban City ibambene ngeqanda macala omabini neStellenbosch FC komnye umdlalo weBetway Premiership obubanjelwe eChatsworth Stadium, eThekwini.
