Umonzakalo waseqatheni unyanzelise umdlali wasesiswini kwiKaizer Chiefs, uLebohang Maboe, ukuba arhoxe kwiBafana Bafana emva kwemini ngoLwesibini.
UMaboe wonzakala ngethuba Amakhosi edlala neLamontville Golden Arrows kumdlalo weBetway Premiership eMbombela Stadium, eNaspoti, ngeCawa.
IBafana isenkampini, ilungiselela imidlalo yemfezeko ye-2027 Africa Cup of Nations (AFCON) kunye neGuinea e-Orlando Amstel Arena, eSoweto, emva kwemini ngoMgqibelo. Emva koko, iBafana izakudlala ne-Eritrea e-Al Salam Stadium, eCairo, kwelaseYiphutha ngoLwesithathu kuleveki ezayo.
Ugqirha weBafana, uTshepo Molobi, udize ukuba uMaboe ufike enkampini ngeCawa ngokuhlwa sele onzakele eqatheni. Emva kokuphononongwa kweqatha lakhe ngoMvulo, kuye kwathatyatywa isigqibo sokumkhulula.
“Ukruneke eqatheni ngethuba edlalela iKaizer Chiefs, kwaye kuzakuphononongwa ubuzaza bomonzakalo. Akazokukwazi ukuba yinxalenye yenkampu okwangoku,” utshilo uMolobi.
Kusenjalo, umqeqeshi weBafana, uPitso Mosimane, ubize umdlali wasesiswini we-Orlando Pirates, uTshepang Moremi, ukuba athabathe indawo kaMaboe.
