Idlalela iqela lesizwe lakokwayo okokugqibela, imbunguzulu yomdlali wase-Argentina, uLionel Messi uncedise kumanqaku amabini, waze wafaka elesithathu ngethuba iLos Albiceleste inqunqela egoqweni iBenin, iyibetha ngamanqaku amathathu eqandeni kumdlalo wobuhlobo eMâs Monumental Stadium, eBuenos Aires, ngentseni yangoLwesithathu, ngokwexesha loMzantsi Afrika.
Emva kokungabikho kwamanqaku ekupheleni kwesiqingatha sokuqala, i-Argentine iwuthe nyi umcephe ngethuba uNicolás Otamendi efaka inqaku lokuqala kwibhola ebeyiphiwe nguMessi ngomzuzu wamashumi amahlanu ananye.
UMessi, odlalela i-Inter Miami kwiMajor League Soccer (MLS) kwelaseMelika, uphinde wapasa ibhola kumzuzu wamashumi amathandathu ananye, yaze yafakwa nguNico Paz.
UMessi, oneminyaka engamashumi amathathu anethoba, ufake inqaku lesithathu le-Argentina ngomzuzu wamashumi asixhenxe ananye. Ibilinqaku lakhe lekhulu namashumi amabini anesithandathu kwimidlalo engamakhulu amabini anesibhozo.
