Iphehlelelwe ngokusesikweni eBeacon Bay, eMonti, ngeCawa iKay B Promotions, eliqumrhu elitsha labathelekisi bamanqindi.
IKay B Promotions izakubanetumente yayo yamazibulo e-Orient Theatre, eMonti, ngeCawa umhla wamashumi amathathu ananye.
“Eli liphupha endabanalo ukususela kwiminyaka yee-1970s mhla umama wam wandithabatha waya nam kwitumente eSisa Dukashe,” utshilo uMzi Booi, ongusihlalo weKay B Promotions.
UBooi ulebele ngelithi iKay B Promotions ithiywe ngegama lonyana wakhe, uKwanda, owaqokelela abasetyhini namaduna kwiqela lakhe.
Igosa eliphezulu kwiBoxing South Africa (BSA) uMandla Ntlanganiso ubeluzimasile oluphehlelo lweKay B Promotions. UNtlanganiso ubekwe kwesisikhundla nguMphathiswa weZemidlalo uZizi Kodwa kutsha nje.
Kusenjalo, umlo ophambili kwitumente yeKay B Promotions izakube iyintshinga yoMzantsi Afrika kudidi losiba phakathi kwentshatsheli ekhuselayo uZolisa Batyi nomcelingeni uYamkela Phaliso.
UBatyi uzakube ekhusela intshinga yakhr okwesibini kususela mhla wanqumamisa owayeyintshatsheli uJeff Magagane kumjikelo wesibini kumlo owawubanjelwe eNgoako Ramatlhodi Sports Complex eSeshego, ePolokwane, ngoDecember wango-2022.
