Ibiyimvula yamanqaku i-Algeria ibambene neBafana Bafana ngamanqaku amathathu macala kumdlalo wobuhlobo eNelson Mandela Stadium, e-Algiers, ngentseni yangoLwesithathu, ngokwexesha loMzantsi Afrika.
Emva kokumelana noxinezelelo ebeluvela kwiBafana, iiDesert Foxes ziphale phambili ngenqaku elifakwe nguYassine Benzia ngomzuzu wamashumi amabini anesibini.
Kuthabathe iBafana imizuzu elishumi elinambini ngaphambi kokufaka inqaku lokulinganisa lifakwa nguThemba Zwane. IBafana ihambe phambili okokuqala ngethuba uZwane efaka inqaku lakhe lesibini xa kanye usompempe ebecinga ngokuhlaba ikhefu.
I-Algeria iqale isiqingatha sesibini ngokuquqa ibuyelela emhlabeni weBafana. Kwaye ayingakhe yothuse into yokubona ukapteni we-Algeria, uYasine Brahimi, efaka inqaku lokulinganisa ngomzuzu wamashumi amahlanu anesithathu.
Iphinde yaphala phambili iBafana ngethuba ilalela u-Elias Mokwana lithumela ibhola eya yabetheka ku-Iqraam Rayners ngomzuzu wamashumi amathandathu.
Kanye nje kwimizuzu emine emva koko, uBenzia ufake inqaku lakhe lesibini kulomdlalo nelesithathu leeDesert Foxes emva kokubetha into entle ibhola yangcangcazelisa umnatha.
