Imbethi-manqindi yaseMpuma Koloni ebekwa phezulu, uPhumelela ‘Truth’ Cafu, akanamdla ‘kwingxolo’ eyenziwa nguSikho ‘Sequence’ Nqothole malunga nomlo ongabakhona phakathi kwabo.
Endaweni yalonto, lentshatsheli yoMzantsi Afrika kudidi lwejunior-bantamweight ithi ayinamdla kumlo noNqothole njengokuba ijonge kwenye indawo ngoku.
“Iyandixaka into yokuva ukuba uNqothole ufuna ukulwa nam ngoku. Wabaleka ngexa wayenikwa ithuba lokulwa nam kulonyaka ophelileyo. Wasuka wathetha amabali amaninzi,” utshilo uCafu.
Lenzalelwane yaseDuncan Village, ebekwa kuluhlu oluphezulu lweembethi-manqindi ezilishumi kwimibutho emine ephambili ehlabathini, ineenjongo eziphakamileyo kulonyaka njengokuba inethemba lokuphumelela emanqindini.
Ngokwangoku, uCafu ukwindawo yethoba kwiWorld Boxing Council (WBC), kwindawo yesithandathu kwiWorld Boxing Association (WBA), kwindawo yesine kwi-International Boxing Federation (IBF) nakwindawo yesihlanu kwiWorld Boxing Organisation (WBO).
Ukanti kwelinye icala, uNqothole oyinzalelwane yaseMthatha, ukwindawo yeshumi elinanye kwiWBA, ulele isibhozo kwi-IBF nakwindawo yesixhenxe kwiWBO.
“Andijonganga kuye. Mna ndijonge ekuceleni umngeni kwintshinga yehlabathi kuba ndikholelwa ukuba ndizakulifumana ithuba kulonyaka. UNqothole uyazi kakuhle into yokokuba akanakundibetha,” uphefumle watsho uCafu.
