Imbethi-manqindi yaseMelika uRaymond ‘Danger’ Muratalla ubethe uXolisani ‘Nomeva’ Ndongeni waseMzantsi Afrika ngamanqaku eDesert Diamond Arena eGlendale, e-Arizona, ngentsasa yangoMgqibelo, ngokwexesha loMzantsi Afrika.
Kuye kwafuneka esebenze nzima lobudul’egeqa waseCalifornia, eMelika, njengokuba uNdongeni ecacisile ukuba ebengayangocweya kulamlo.
Ekugqibeleni, banqwale bobathathu abagwebi, bevumelana ngamxhelomnye, besithi uMuratalla uphumelele. U-Esther Lopez uthe uMuratalla uphumelele 97-93, uPat Russell 99-91 noChris Wilson 98-92.
Ngoku uMuratalla uyiphumelele yonke imilo yakhe engamashumi amabini, engqengqise amadoda alishumi elinesithandathu. Ukanti, uNdongeni uphumelele izihlandlo ezingamashumi amathathu ananye, wabethwa kahlanu.
