Kwisithuba seentsuku ezingaphaya kweshumi elinesine ebonise abalandeli bamanqindi izinto zamehlo, ebakhumbuza ukuba usekhona emanqindini ngethuba enqumamisa uChumani Tunzi kumjikelo wesithandathu, ngoku izinto zibonakala zisiza kakuhle ngakwicala lika-Aphiwe ‘Swagger’ Boyiya.
Lenjinga yamhlamnene kudidi losiba nolwejunior-lightweight eMzantsi Afrika izibandakanye neKay B Promotions, apho imicimbi yokuthelekiswa kwayo izakuphathwa khona.
Ngaphambi kokuqubisana noTunzi kumlo wentshinga yodidi lwejunior-welterweight eMpuma Koloni, lomfana wase-Amalinda wayegqibele ukulwa ngethuba enqunyanyiswa kumjikelo wesihlanu nguKhaya Busakwe, oyinjinga yoMzantsi Afrika kudidi lwelightweight ngoku, ngo-Okthobha 2022.
“Siqukumbele indlela ezakuhanjwa ngu-Aphiwe neqela lakhe kwezinyanga zintandathu,” utshilo umlawuli weKay B Promotions uMzi Booi nangona enganabanga ngakumbi.
Emva kokubetha kwakhe uTunzi, uBoyiya ungene tshwa kuluhlu lweembethi-manqindi ezikumanqwanqwa eBoxing South Africa (BSA), kwaye ukwindawo yesine ngoku. – Monwabisi Jimlongo
