Eshiyekelwe nje yimpumelelo kumdlalo omnye ukuze angene kwitumente yamazwe ngamazwe ase-Afrika, umqeqeshi weBafana uHugo Broos ugrogrisa ngokulahla emsebenzini ukuba eliqela libethwe kuyo yomibini imidlalo yemfezeko elizakuyidlala ne-Uganda noMzantsi Sudan.
IBafana idlala neeCranes eMandela National Stadium, eKampala, kwelase-Uganda ngentsimbi yesithathu ngoLwesihlanu, iphinde idlale noMzantsi Sudan eCape Town Stadium ngoLwesibini kuleveki ezayo.
“Ukuba sinokubethwa kuyo yomibini lemidlalo, ndakwenjenjeya ukubuyela eBelgium. Ningaqiniseka ngalonto leyo. Ukuba asiphumeleli, ewe i-Uganda kude nekhaya izakubanzima, kodwa umdlalo noMzantsi Sudan ekhaya, ndiyanixelela ukuba ngephanyazo, ndakubamba inqwelo-ntaka yokuqala, ningaphinde nindibone,” uBroos utshilo ngoMvulo.
IBafana kaBroos idinga ukuphumelela umdlalo omnye kwemibini ukuze ingene kwitumente yonyaka ozayo. IBafana iphumelele imidlalo emibini, yadlala ngokulingana kwemibini, logama iiCranes zase-Uganda ziphumelele imidlalo emithathu, zadlala ngokulingana kumdlalo omnye.
Kusenjalo, uMihlali Mayambela urhoxile kwinkampu yeBafana ngenxa yomonzakalo, kwaye indawo yakhe ithatyathwe nguDevin Titus weStellenbosch FC.
