Uzakubuyela eqongeni uLandile ‘Man Down’ Ngxeke njengokuba ezakulwa no-Eric Gamboa wseMexico eBorder Conference Centre, e-Abbotsford Christian Centre, eMonti, kulenyanga ezayo.
Zimbini iintshinga ezizakulwelwa nguNgxeke noGamboa ngoLwesihlanu umhla wamashumi amabini kuJuni. Intshinga yeWorld Boxing Organisation (WBO) Intercontinental ephethwe nguNgxeke kunye neye-IBF International kudidi lwentambanani nengenamntu zizo ezizakulwelwa.
UNgxeke, oneminyaka engamashumi amathathu nosele ephumelele imilo elishumi elinesihlanu, enqumamise amadoda asibhozo, wabethwa komnye, waze walwa ngokulingana komnye, ubekwa kwindawo entle kwimibutho ephambili yamanqindi ehlabathini. Ukwindawo yesithandathu kwi-IBF nakwiWorld Boxing Council (WBC), logama ekwindawo yesine kuluhlu lweWBO.
Ephumelele imilo engamashumi amabini anesithandathu, enqumamise amadoda alishumi elinesine, ebethwe kwimilo emibini, uGamboa, oneminyaka engamashumi amathathu nogama lipheleleyo lingu-Eric Gerardo Gamboa Barrera, akekho kuluhlu lwemibutho yamanqindi ephambili ehlabathini.
