Ngaphambili ububekelwe uMgqibelo womhla wamashumi amabini anesine kuMeyi, ngoku uLwando Mgabi uzakukhusela intshinga yakhe yoMzantsi Afrika kudidi lwejunior-bantamweight kumlo noSechaba Zuma kulenyana ezayo.
UMgabi, owazalelwa eDuncan Village, eMonti, uzakube ekhusela intshinga yakhe okokuqala equbisana noZuma, okwindawo yokuqala, kwiholo yedolophu yase-Estcourt, KwaZulu-Natal, ngoMgqibelo umhla wesixhenxe kuJuni.
“Ewe, utshintshiwe umhla womlo, ngoku umlo ungomhla wesixhenxe kuJuni. Asiyongxaki kuthi leyo kuba sizakuya phaya, sifike siwuphumelele umlo,” utshilo uMgabi.
Lentshatsheli yayiphumelela lentshinga yayo emva kokubetha uSihle Jelwana ngamanqaku eSunningdale Sport Complex, eMilnerton, eKapa, ngoSeptemba kulonyaka ophelileyo.
UMgabi, oneminyaka engamashumi amabini anesithathu nozinze eKhayelitsha, eKapa, akakabethwa njengokuba eyiphumelele yosixhenxe imilo yakhe, enqumamise amadoda amabini.
Ephumelele imilo emine, wanqumamisa indoda kumlo omnye, wabethwa kwemini, waze walwa ngokulingana komnye, uZuma akakalwi ukususela mhla wabetha uMthobisi Nkosi ePortuguese Hall, eThekwini, ngo-Agasti nyakenye. – Monwabisi Jimlongo
