IMamelodi Sundowns, egqibe umdlalo ngamadoda alishumi, idlale ngokulingana ngenqaku elinye macala neKaizer Chiefs kumdlalo weBetway Premiership eLoftus Versfeld, ePitoli, ngokuhlwa kwangoLwesithathu.
Amakhosi aphale phambili ngenqaku elinye eqandeni ekupheleni kwesiqingatha sokuqala, nqaku elo elifakwe nguFlavio da Silva ngomzuzu wamashumi amabini anesihlanu kwibhola ebivela kuMduduzi Shabalala.
Ukanti, iiBrazilians zisiqale kakuhle isiqingatha sesibini zaze zavuzwa ngenqaku elifakwe ngummi waseColombia uBrayan Leòn kwibhola ebisuka kuThapelo Morena ngomzuzu wamashumi amahlanu anesine.
ISundowns ibetheke iduma elingatsitywa nayintwala ngethuba usompempe womdlalo uLuxolo Badi enika uJayden Adams ikhadi elibomvu ngomzuzu wamashumi amathandathu anesihlanu.
Kusenjalo, AmaZulu abambene ngenqaku elinye macala neLamontville Golden Arrows komnye umdlalo weBetway Premiership eMoses Mabhida Stadium, eThekwini.
Usuthu beluhamba phambili ekupheleni kwesiqingatha sokuqala ngenqaku likaSandile Mthethwa kwibhola ayinikwe nguNkosikhona Radebe ngomzuzu weshumi elinesithandathu. Bekubonakala ngathi Usuthu luzakuphumelela de kwathi gqi uJerome Karelse wafaka inqaku lokulinganisa xa uzakuphela umdlalo.
