ULikho Sigaba uzishiye zilihlwili iintliziyo zabalandeli bamanqindi baseSada emva kokubetha intandane yabo u-Aphiwe Rasmeni eWhittlesea Multipurpose Hall ngoMgqibelo.
Kwaye ngokwenza njalo uSigaba waseMdantsane uyikhusele ngempumelelo intshinga yakhe yaseMpuma Koloni kudidi lwentambanani enqumamisa uRasmeni kumjikelo wethoba.
Ibingumlo omhle lo njengokuba zombini ezimbethi-manqindi bizingoyiki ukubethana wade uSigaba wema yedwa, ephumelela. Ibisisihlandlo sesibini uSigaba ebetha uRasmeni kwanjengokuba wenza njalo e-Orient Theatre, eMonti, ngo-Okthobha kulonyaka ophelileyo.
Kusenjalo, uLuxolo Gungutho waseNxarhuni ubethe uZukisa Mafu waseMdantsane ngamanqaku kumlo wengabula zigcawu kwimijikelo elishumi.
Ezinye iziphumo:
UBonginkosi Solani ubethe uThulani Mcelu kumjikelo wokuqala
USihle Fembi ubethe u-Uyathandwa Ngcuphe ngamanqaku
USimamkele Genu ubethe u-Azola Hekeni ngamanqaku
USakhekile Makhoba ubethe uMasixole Mbanga ngamanqaku
