Akakhathazekanga konke-konke uNtethelelo Nkosi kokuthethwe nguSanele Msimang esithi izakutshintsha izandla intshinga yoMzantsi Afrika kudidi lwejunior-welterweight emveni kokuba belwile kumlo odibanisa iimbethi-manqindi zaKwaZulu-Natal ngoMgqibelo.
UNkosi uzakube ekhusela intshinga yakhe okokuqala xa esilwa noMsimang e-Emperor’s Palace, eKempton Park. Lenzalelwane yaseMtubatuba, eneminyaka engamashumi amabini anesixhenxe, ayikakhuseli lentshinga kususela mhla yayiphumelela ngokunqumamisa uPrince Dlomo kumjikelo wethoba eThekwini ngoNovemba nyakenye.
“Uyadlala ukuba ucinga uzakundibetha. Ndiyintshatsheli, kwaye ndizakuqhubela phambili ndiyintshatsheli nasemva kokulwa naye. Soze ayithabathe intshinga yam,” utshilo uNkosi.
UNkosi, ophumelele imilo emithandathu enqumamise amadoda amathathu, wabethwa kwemibini, wongeze ngelithi: “Ndiyathandabuza ukuba uzakukwazi ukulwa ade adlule kumjikelo wesithandathu. Sithetha ngamanqindi apha, asidlali upuca.
“Ukuba ukholelwa kwelokokuba uzakuphumelela, ndifuna ayithethe phambi kwam ngoLwesihlanu lonto leyo. Mhlawumbi ushwaqiswa kukuba ekude kum.” – Monwabisi Jimlongo
