Ngelingeni AmaZulu ade ayingcamla impumelelo njengokuba ebethe iChippa United ngamanqaku amabini eqandeni kumdlalo weBetway Premiership eMoses Mabhida Stadium, eThekwini, ngokuhlwa kwangoLwesibini.
Omabini lamanqaku, afakwe nguHendrick Ekstein noCelimpilo Ngema, angene kwisiqingatha sokuqala. Usuthu luphale phambili ngenqaku lika-Ekstein ngomzuzu wamashumi amabini anesithandathu emva kwebhola ebisuka kuRowan Human.
Usuthu lufake inqaku lesibini kwimizuzu elithoba elandelayo njengokuba uNgema engcangcazelise umnatha emva kwenye ibhola ibivela kuHuman.
Kusenjalo, iqela eliphala phambili i-Orlando Pirates iphumelele umdlalo wesithandathu ngokulandelelana ngethuba itywatyusha i-TS Galaxy ngamanqaku amabini eqandeni kumdlalo ubuseMbombela Stadium, eNaspoti, ngamanqaku afakwe nguThalente Mbatha noRelebohile Mofokeng.
Kwelinye icala, iSekhukhune United siquthise iRichards Bay FC ngamanqaku amabini eqandeni ePeter Mokaba Stadium, ePolokwane. Amanqaku eBabina Noko afakwe nguSiphesihle Mkhize noSipho Mbule.
