Ziqale kakuhle iiCarthage Eagles zaseTunisia kwitumente ye-2025 Africa Cup of Nations njengokuba zibethe iiCranes zase-Uganda ngamanqaku amathathu kwelinye kumdlalo obubanjelwe e-Olympique Stadium, eRabat, kwelaseMorocco ngokuhlwa kwangoLwesibini.
Inqaku lika-Ellyes Skhiri nelika-Elias Achouri ngawo enze ukuba iiCarthage Eagles ziphale phambili ngamanqaku amabini eqandeni ekupheleni kwesiqingatha sokuqala.
U-Achouri ufake inqaku lakhe lesibini lomdlalo esenza ukuba iiCarthage Eagles zikhokele ngamathathu eqandeni ngaphambi kokuba uDenis Omedi afake eleeCranes.
Kweminye imidlalo, inqaku likaTheo Bongonda likhokelele iiLeopards zaseDemocratic Republic of Congo (DRC) kwimpumelelo yazo yokuqala njengokuba zibethe iiCheetahs zaseBenin ngelinye eqandeni, zaze iiTeranga Lions zaseSenegal zaquthisa iiZebras zaseBotswana ngamanqaku amathathu eqandeni. UNicolas Jackson ufake amanqaku amabini, waze uCherif Ndiaye wafaka elesithathu.
Kusenjalo, ziqale kakuhle iiNigerian Super Eagles zibetha iiTaifa Stars zaseTanzania ngamanqaku amabini kwelinye kumdlalo wazo wokuvula.
USemi Ajayi ufake inqaku lokuqala leeSuper Eagles ngaphambi kokuba uCharles M’Mombwa afake elokulinganisa, waze u-Ademola Lookman wafaka inqaku lempumelelo.
