Ii-Indomitable Lions zaseCameroon zibethe iiPanthers zaseGabon ngenqaku elinye eqandeni kumdlalo wazo wokuvula kwitumente ye-2025 Africa Cup of Nations e-Adrar Stadium, e-Agadir, kwelaseMorocco ngokuhlwa kwangoLwesithathu.
Inqaku elifakwe yifolosi eneminyaka engamashumi amabini anesibini nedlalela i-UD Levante uKarl Edouard Blaise Etta Eyong ngomzuzu wesithandathu kumdlalo wakhe wesine, lincede ii-Indomitable Lions zabetha iGabon.
Ukanti, iiStallions zaseBurkina Faso zingcangcazelise umnatha kabini kwixesha elongezelelweyo njengokuba zibethe i-Equatorial Guinea ngamanqaku amabini kwelinye.
UMarvin Anieboh ufake inqaku leNational Thunder ngaphambi kokuba uGeorgi Minoungou no-Edmond Tapsoba bafaka amanqaku eStallions.
Kwelinye icala, iiDesert Foxes zase-Algeria ziquthise iSudan ngamanqaku amathathu eqandeni. URiyad Mahrez ufake amanqaku amabini, laze elesithathu lafakwa ngu-Ibrahim Maza.
Kusenjalo, inqaku elifakwe ngu-Amad Diallo likhokelele iintshatsheli ezikhusela i-AFCON, i-Ivory Coast, kwimpumelelo ngenqaku elinye eqandeni zibetha iiMambas zaseMozambique.
