Umqeqeshi wamanqindi waseMonti, uKhangelani Jack, ufumene ikhaya elitsha eMcAusland Boxing Gym eGauteng phantse kwiiveki ezimbini ekhokelele injinga yoMzantsi Afrika kudidi losiba uZolisa Batyi kwimpumelelo.
UJack uzakuqeqesha intshatsheli yoMzantsi Afrika kudidi lwempukane kwicandelo labasetyhini uSimangele Hadebe nowasetyhini uBonita van Jaarsveldt, oyinjinga yeli kudidi lwelightweight.
Ezinye iimbethi-manqindi ezizakuqeqeshwa nguJack ziquka uDonjuan van Heerden, uMonica Mkandla, uBernice Ferreira, uSihle Shange, uLybon Ntshani noBouksan Bukasa.
“Injongo yam kunye neqela lam kukwakha ubudlelwane basekhaya, siqhubela phambili simoya-mnye ukuncedisana ekufezekiseni amaphupha. Uninzi apha luzibandakanye namanqindi ukuguqula ubomi babo nokuxhasa iintsapho zabo,” utshilo uJack.
Sisihlandlo sesibini uJack, owaphumelela imbasa yokuba yi-2023 Trainer of the Year, elinikela umva iMonti. Wazibandakanya neRock Solid Boxing and Fitness Gym eBenoni ngoSeptemba kulonyaka ophelileyo, waze wabuyela ekhaya ngoDisemba.
