IChippa United izakudlala ne-Orlando Pirates kumdlalo wamaqela amane okugqibela kwiNedbank Cup emva kokubetha iTS Galaxy ngamanqaku amabini eqandeni eMbombela Stadium, eNaspoti, ngeCawa.
IiBuccaneers zingene kumjikelo owandulela owokugqibela emva kokubetha AmaZulu ngamanqaku amane kwamabini eMoses Mabhida Stadium, eThekwini, ngokuhlwa kwangoMgqibelo.
Ukanti, iStellenbosch FC sizakwamkela iMamelodi Sundowns komnye umdlalo. IStellies siquthise iSuperSport United ngamanqaku amane eqandeni, logama iSundowns ibethe i-University of Pretoria ngamanqaku amane kwamathathu.
Sibuyele kumdlalo weeChilli Boys neeRockets, iqela laseMpuma Koloni lifake inqaku lokuqala ngentloko kaBienvenu Eva Nga ngomzuzu wamashumi amathathu.
IiRockets zilahlekelwe lithuba elihle uPogiso Sanoka esilela ukufaka ibhola ebisuka emlotheni, yaze yabanjwa ngunozinti weeChilli Boys uStanley Nwabali kwimizuzu emibini ngaphambi kokuphela komdlalo emva kokuba uSirgio Kammies ebambe ibhola ebhokisini.
Kanye nje emva koko, uLebone Seema uwise u-Aviwe Mqokozo phakathi ebhokisini, waze uRoscoe Pietersen akalibazisa wayibetha phakathi isuka emlotheni.
Kusenjalo, iPremier Soccer League (PSL) ibhengezile ngeCawa ukuba umdlalo wamagqibelakankqoyi eNedbank Cup uzakudlalelwa eMbombela Stadium.
