Iqale kakuhle iBanyana Banyana kwitumente yeWomen’s Africa Cup of Nations (iWAFCON) njengokuba iquthise iGhana ngamanqaku amabini eqandeni kumdlalo wokuvula eHonneur Stadium, e-Oujda, kwelaseMorocco ngokuhlwa kwangoMvulo.
Emva kokubuza imibuzo engenazimpendulo, ngelingeni iBanyana ide yawungcangcazelisa umnatha ngethuba uLinda Motlhalo efaka ibhola ebisuka echaphazeni ngomzuzu wamashumi amabini anesibhozo.
IBanyana ifake inqaku lesibini kwimizuzu emithandathu elandelayo ngequza likaJermaine Seoposenwe, ozakuyeka ukudlala imidlalo yamazwe ngamazwe emva kwaletumente.
Ibisisihlandlo samashumi amabini anesithathu uMotlhalo efaka inqaku kwiBanyana, logama uSeoposenwe sele efake amanqaku angamashumi amabini anesihlanu.
