Emva kokungcamla impumelelo nokufikelela kumjikelo wesithathu kwiWBC Grand Prix eRiyadh kwelaseSaudi Arabia, uNtethelelo ‘Baby G’ Nkosi akasenawo umdla kwintshinga yoMzantsi Afrika kudidi lwejunior-welterweight.
Ngokokutsho kukaDamien Durandt, ongumqeqeshi kaNkosi nozinze eRhawutini, umdla walomfana, oneminyaka engamashumi amabini anesibhozo, ukwiWBC Grand Prix.
UNkosi wayithi xibilili intshinga yoMzantsi Afrika kudidi lwejunior-welterweight ngoMatshi eyikhusele nje kanye kuphela ukususela mhla wayiphumelela ngoNovemba 2023, waze wahamba wayokuthabatha inxaxheba kwiWBC Grand Prix.
“Intshinga yoMzantsi Afrika asiyonto ephambili kuthi. Sinabantu abanyeke intshinga yoMzantsi Afrika kudidi lwejunior-welterweight. Ukuphumelela intshinga yeWBC Grand Prix yeyona njongo yethu ephambili ngaphambi kokuyokulwela intshinga yehlabathi. Ndikholelwa ekubeni uNkosi angayiphumelela iWBC Grand Prix,” utshilo uDurandt.
UNkosi waseMtubatuba, KwaZulu-Natal, waqala uhambo lwakhe kwiWBC Grand Prix ngokubetha umYiphutha uMarwan Mohamad Madboly ngo-Epreli, waze emva koko wabetha uJu Wu waseChina kulenyanga ephelileyo.
Ngoku, uNkosi uzakubuyela eRiyadh kulenyanga ezayo njengokuba ezakulwa kumjikelo wesithathu wolukhuphiswano. – Monwabisi Jimlongo
