Igalelekile KuGompo City imbethi-manqindi yasePhilippines uNeel ‘No Fear’ Jacamos ngaphambi komlo wakhe wangoMgqibelo noSiseko ‘King Panda’ Teyisi.
Ezakulwa okokuqala ngaphandle kwemida yelizwe lakhe, uJacamos uthe cakatha eKing Phalo Airport KuGompo City ngokuhlwa kwangoMvulo kwiintsuku nje ezimbalwa ngaphambi kokuvana amandla noTeyisi kumlo wentshinga engenamntu yeWorld Boxing Council (WBC) Youth kudidi lwejunior-flyweight. Lomlo uzakubanjelwa eJan Smuts Stadium KuGompo City.
UJacamos, ongumhlali waseGeneral Santos City kwelasePhilippines, uze eMzantsi Afrika eyiphumelele yonke imilo yakhe esixhenxe, enqumamise umfana omnye. Wawuphumelela ngamanqaku umlo wakhe wokugqibela ngethuba esilwa noKurt John Pabular kwintshinga yePhillipines Games and Amusements Board Youth kudidi lwejunior-flyweight ngo-Agasti kulonyaka ophelileyo.
Ukanti, uTeyisi, oyinzalelwane yaseMdantsane noyiphumelele yonke imilo yakhe elithoba, enqumamise abafana abasixhenxe, ugqibele ukulwa ngethuba wayenqumamisa u-Athenkosi Thongwana kumjikelo weshumi elinesibini kumlo awayekhusela kuwo intshinga yakhe yoMzantsi Afrika kudidi lwejunior-flyweight e-Orient Theatre KuGompo City ngoDisemba nyakenye.
UJacamos noTeyisi bazakujamelana okokuqala kwinkomfa nonoondaba eBuffalo City Stadium KuGompo City kusasa ngoLwesibini. – Monwabisi Jimlongo
