Emva kokufeda ukuphumelela intshinga yoMzantsi Afrika kudidi lwejunior-bantamweight isihlandlo sesibini kumlo owawuse-Orient Theatre, KuGompo City, ngoDisemba kulonyaka ophelileyo, uLwando Mgabi ubuyela kwakulendawo enye kulenyanga ezayo.
Kwanjengokuba wanqunyanyiswa kumjikelo wesine yintshatsheli yoMzantsi Afrika kudidi lwejunior-bantamweight uMoyisi Booi kumlo wakhe wokugqibela, uMgabi unyukele ngentla eyokulwa kudidi lwejunior-featherweight xa equbisana noThabang Mofula e-Orient Theatre.
“Ndizakubuyela eqongeni xa ndisilwa noThabang Mofula kumlo okudidi lwejunior-featherweight,” itshilo lentshatsheli yamhlamnene nezinze eKhayelitsha, eKapa.
Kungoku nje, uMgabi, oyinzalelwane yaseDuncan Village, KuGompo City, ubekwa kwindawo yesibhozo kudidi lwejunior-featherweight kuluhlu lukaBoxing South Africa.
Kusenjalo, emva kokubethwa kwimilo emithathu elandelelanayo ngelingeni uMofula waseKanana e-Orkney kwiphondo loMntla Ntshona waye waphumelela ngethuba ebetha uDoron Zinman ngamanqaku ngo-Epreli.
Kungoku nje uMofula uqeqeshwa nguCharrit Mukondeleli emva kokuba wayephantsi kwesandla sikaBernie Pailman. – Monwabisi Jimlongo
