Injinga yoMzantsi Afrika kudidi lwejunior-flyweight, uMpumelelo Tshabalala, utsha ziintambo, kwaye ukholelwa ukuba angayibetha intshatsheli yehlabathi uSivenathi ‘Special One’ Nontshinga.
Ethetha kwinkqubo kamabonakude iTKO Boxing Magazine kuSABC 2 ngoLwesihlanu, uTshabalala uthe iinjongo zakhe kukulwa noNontshinga, oyintshatsheli ye-International Boxing Federation (IBF) kudidi lwejunior-flyweight.
“Ndiyeza kuNontshinga. Kancinane, kancinane, ukuba kukho into eyenzekayo, ndiza kuye ngqo,” utshilo uTshabalala, oyintshatsheli yeWorld Boxing Organisation (WBO) Intercontinental kudidi lwejunior-flyweight.
Nkqu nomqeqeshi kaTshabalala, uPeter Malinga, uyakholelwa ukuba imbethi-manqindi yakhe ingenza kwenzeke xa inokulwa noNontshinga.
“Ndicinga into yokokuba inkwenkwe sele ilungile ngoku. Siziva sime kakuhle ukuba singathabatha khona uNontshinga ukuba sinokulifumana ithuba,” utshilo uMalinga, owayeyintshatsheli yoMzantsi Afrika, iWorld Boxing Union (WBU) ne-International Boxing Organisation (IBO) kudidi lwewelterweight.
UTshabalala, obekwa kwindawo yethoba kwiWBO, wabethwa ngamanqaku nguSiphamandla Baleni kumlo wentshinga yoMzantsi Afrika kudidi lwejunior-flyweight ngo-Okthobha 2021. UTshabalala sele ephumelele imilo emihlanu ukususela mhla wabethwa nguBaleni.
