Njengokuba uJonathan ‘Bomba’ Gonzalez wasePuerto Rico esalibele kukudlala undize nje engasityikityi isivumelwano sokulwa noSivenathi ‘Special One’ Nontshinga, ngoku kubonakala ngathi lembethi-manqindi yaseMpuma Koloni izakulwa kwelaseJapan kwiinyanga ezine ezizayo.
U-Ahikino Honda weTeiken Promotions eJapan usebenza imini nobusuku kwilinge lokulwisa uNontshinga, oyinjinga ye-International Boxing Federation (IBF) kudidi lwejunior-flyweight, nentshatsheli yeWorld Boxing Council (WBC) and World Boxing Association (WBA) uKenshiro Teraji.
“NgeCawa ndifumene umnxeba ovela kuMnumzana Honda malunga nalomlo. Ndiyawufuna lomlo, kwaye sekumbovu sifikelele kwisivumelwano. Xa sasinikwa lomlo noTeraji ndathi “masiwuthatheni”. USive unayo indlela angambetha ngayo uTeraji,” utshilo umqeqeshi kaNontshinga uColin Nathan.
UNontshinga uzakuya kulomlo emva kokunqumamisa ummi waseMexico, u-Adrian Curiel Dominguez, kumjikelo weshumi e-Oaxaca kwelaseMexico kwiinyanga ezimbini ezigqithileyo.
Kwelinye icala, uTeraji waseKyoto kwelaseJapan wanqumamisa uHekkie Budler waseMzantsi Afrika kumjikelo wethoba ngoSeptemba kulonyaka ophelileyo. Kwaye, ubethe uCarlos Canizales ngamanqaku e- Edion Arena, e-Osaka, kwelaseJapan, ngoJanyuwari kulonyaka.
