Ukuphumelela kwimidlalo emine nokubambana komnye kunike umqeqeshi weMamelodi Sundowns uRulani Mokwena imbasa ye-April Coach of the Month ebetha uJose Riveiro we-Orlando Pirates, uSteve Barker weStellenbosch FC kunye nababambe ilima kwiChippa United uThabo September noKwanele Kopo.
UMokwena ukhokele iiBrazilians zibetha iRichards Bay FC, iCape Town Spurs, iSekhukhune United neTS Galaxy. Iinkunzi zaseTshwane zabambana neMoroka Swallows.
Imbasa yePlayer of the Month iphunyelelwe nguSinoxolo Kwayiba weeChilli Boys emva kokufaka amanqaku amane kwimidlalo emine.
Ukanti, u-Asekho Tiwani uphumelele imbasa yeGoal of the Month emva kokufaka inqaku ngethuba iBabina Noko ibetha iSpurs ngenqaku elinye eqandeni.
