Uluntu lwamanqindi eMzantsi Afrika luvuke ngentseni yangoLwesibini lweva iindaba ezibuhlungu zokusweleka kowayeyintshatsheli u-Unathi Myekeni, obeneminyaka engamashumi amane anesine.
UMyekeni, owayeyinjinga yeWorld Boxing Federation (WBF) kwicandelo labasetyhini kudidi lwejunior-featherweight nolosiba, uphulukene nobomi bakhe emva kwedabi nesifo somhlaza.
Wayengudade omncinane wongasekhoyo uMhikiza Myekeni, owayeyintshatsheli yeWorld Boxing Council (WBC) International kudidi lwempukane, injinga ye-International Boxing Organisation (IBO) naseMzantsi Afrika kudidi lwejunior-flyweight, nowabulawa sisifo somhlaza ngo-Agasti 2022.
Echithe iminyaka elishumi elinambini edlala amanqindi ahlawulelwayo, uMyekeni, nowayesebenza emgodini eCarletonville, waphumelela imilo elishumi elinambini, wanqumamisa oosidi abahlanu, wabethwa kwimilo emihlanu, waze walwa ngokulingana komnye.
