Lubekiwe usuku azakungcwatywa ngalo ongasekhoyo u-Unathi ‘Showtime’ Myekeni, owayeyintshatsheli yehlabathi nosweleke ngoMvulo weveki ephelileyo.
UMyekeni uzakubekwa kwikhaya lokulinda kwilali yasePhumlani, KuGompo City, emva kwenkonzo yomngcwabo ezakubanjelwa kwiholo yendawo kuloMgqibelo esiya kuwo.
Lenjinga yamhlamnene kwiWorld Boxing Federation (WBF) kudidi lwejunior-featherweight nolwefeatherweight isutywe kukufa emva kokoyisakala kwidabi nomhlaza.
UMyekeni wayengudade omncinane kaMhikiza Myekeni, owayeyintshatsheli yeWorld Boxing Council (WBC) International kudidi lwempukane nenjinga ye-International Boxing Organisation (IBO) naseMzantsi Afrika kudidi lwejunior-flyweight. Naye uMhikiza wawa emva kokoyiswa lidabi nomhlaza ngo-Agasti 2022.
Omnye woovulindlela kumanqindi abasetyhini, uMyekeni waphumelela imilo elishumi elinambini wanqumamisa oosisi abahlanu, waze wabethwa izihlandlo ezintlanu kwiminyaka elishumi elinambini esilwa kudidi lwabahlawulwayo.
Kusenjalo, i-Ubuntu Boxing Fraternity kunye zabalandeli bamanqindi bazakundwendwela usapho lwakwaMyekeni ePhumlani ngentsimbi yokuqala emva kwemini ngoLwesibini.
